ယခုနှစ်တွေအတွင်း အရှေ့အာရှဒေသမှာ စီးပွားရေးတိုးတက်မှု အရှိန်ရလာပေမဲ့ ကျားမ တန်းတူရှိမှုမှာ အများကြီး နောက်ကျနေတာကြောင့်၊ ဘန်ကောက်မှာ ကျင်းပတဲ့ ကမ္ဘာ့စီးပွားရေး ဖိုရမ်မှာ ‘Asia Women as the Way Forward’ ခေါင်းစဉ်နဲ့ အာရှ အမျိုးသမီးကဏ္ဍကို အလေးထား ဆွေးနွေးခဲ့ကြသည်။အဲဒီအစီအစဉ်မှာ ဒေါ်အောင်ဆန်းစုကြည်က အာရှဒေသဟာ စီးပွားရေးဖွံ့ဖြိုးတိုးတက်မှု တစ်ခုထဲနဲ့ အမျိုးသမီးတွေရဲ့ စွမ်းဆောင်ရည် တိုးတက်ဖို့ မလုံလောက်ဘူး၊ လူ့အဖွဲ့အစည်းရဲ့ ကဏ္ဍတိုင်းမှာ အမျိုးသမီးတွေ ပါဝင်ခွင့်ရလာဖို့ ယဉ်ကျေးမှု အပြောင်းအလဲတွေ လုပ်ဖို့ လိုအပ်နေပြီဟု ဆွေးနွေးသွားသည်။
ဒေါ်အောင်ဆန်းစုကြည် က “လူတွေက ကမ္ဘာ့စီးပွားရေးနဲ့ နိုင်ငံရေးဖွံ့ဖြိုးမှုမှာ အမျိုးသမီးတွေ ပါဝင်နိုင်ပါ့မလား၊ ပါဝင်ပြီး သူတို့ ဘာတွေ လုပ်နိုင်မှာလဲလို့ မေးကြတယ်။ ကျမ ပြန်မေးချင်တာက ကျမတို့အမျိုးသမီးတွေ ပါဝင်ဆောင်ရွက်ဖို့ကို ဘာကြောင့် ခွင့်မပြုတာလဲ။ အမျိုးသမီးတွေ ကဏ္ဍတိုင်းမှာ လုပ်ဆောင်နိုင်တယ်လို့ ကျမထင်တယ်၊ ဒါပေမဲ့ သူတို့ကို ပါဝင်ခွင့် မပြုကြဘူး” လို့ သူ့အမြင်ကို ပြောခဲ့သည်။
“အဲဒီ ကျားမ ကွာဟချက်ကို ကျဉ်းသွားအောင် လုပ်ဖို့က စီးပွားရေးဖွံဖြိုးလာရုံနဲ့ မရဘူး။ ယဉ်ကျေးမှုတန်ဖိုးတွေနဲ့လည်း သက်ဆိုင်နေတယ်။ အမျိုးသမီးတွေရဲ့ စွမ်းဆောင်ရည်ကို ဘာကြောင့် ခွင့်မပြုကြသလဲဆိုတာကို အဖြေရှာလိုတယ်ဆိုရင် ယဉ်ကျေးမှုကိစ္စတွေကိုလည်း ကိုင်တွယ်ဖို့လိုတယ်လို့ ကျမ ထင်တယ်” ဟု ဆက်ပြောသည်။
မြန်မာနိုင်ငံမှာ အမျိုးသမီးတွေ စီးပွားရေးမှာ အရေးပါတာကို အထင်အရှား မြင်တွေ့နေကြရပေမဲ့၊ အဲဒီပါဝင်မှုက နိုင်ငံရေးနယ် အထိ တိုးချဲ့မသွားဟု ဒေါ်အောင်ဆန်းစုကြည် က ပြောသည်။ နိုင်ငံရေးနယ်ထဲမှာ ခွဲခြားခံရမှု အမြစ်တွယ်နေတာကြောင့် အမျိုးသမီးတွေကလည်း ခေါင်းဆောင်မှုကဏ္ဍကို ယူဖို့ တွန့်ဆုတ်နေတတ်သည်ဟု ဆိုသည်။
“နိုင်ငံရေးနဲ့ ပတ်သက်ရင် ကျမတို့က မကြာခဏ ခွဲခြားဆက်ဆံခံရတယ်။ ဧပြီလ အစောပိုင်း ကြားဖြတ်ရွေးကောက်ပွဲ မတိုင်မီ အထိ၊ လွှတ်တော်အမတ် ၆၀၀ကျော်မှာ အမျိုးသမီး ၁၅ ဦးပဲ ပါတယ်။ ဒါ မြန်မာ့နိုင်ငံရေးမှာ အမျိုးသမီးတွေကို အများကြီး ကန့်သတ်ထားတာ မြင်ကြည့်နိုင်တယ်။ ကြားဖြတ်ရွေးကောက်ပွဲပြီးတော့ ကျမတို့ အမျိုးသမီး ၁၃ ဦး ထပ်ပေါင်း ထည့်နိုင်ခဲ့တယ်။ အရေအတွက် နှစ်ဆနီးပါးတော့ တက်သွားတာပေါ့၊ ဒါ မလုံလောက်သေးပါဘူး။ အစိုးရ ကက်ဘိနက်တဖွဲ့လုံးမှာ အမျိုးသမီးဆိုလို့ ဒုဝန်ကြီး နှစ်ဦးပဲ ရှိတယ်” ဟု ဒေါ်အောင်ဆန်းစုကြည်က မြန်မာနိုင်ငံရေးမှာ ကျားမ တန်းတူမရှိမှုကို ဆွေးနွေးခဲ့သည်။
No comments:
Post a Comment
ပေးထားသည့် မှတ်ချက်များအား မကြာမီ တင်ပေးပါမည်။ခေတ္တစောင့်ဆိုင်းပါ။
ကျေးဇူးတင်ပါသည်။